ОСА ЯК СОЛ ТО БОЗИҲОИ ОСИЁ-2022-РО ҶАШН ГИРИФТ

Шӯрои олимпии Осиё (ОСА) дар маросиме, ки рӯзи 10 сентябр дар шаҳри Ҳангжоуи Чин баргузор шуд, дар таҷлили як сол то 19-ум Бозиҳои Осиё ширкат кард.

Маросим, дар Маркази олимпии Ҳангжоу аз ҷониби Кумитаи тадорукоти Бозиҳои Осиё - Ҳангжоу баргузор шуд.

Директори генералии OCA Ҳусайн Ал-Мусаллам варзишгарон ва кумитаҳои миллии олимпии кишварҳои Осиёро барои иштирок дар Ҳангжоу-2022 даъват карда, раиси Кумитаи ҳамоҳангсозии ОСА Раҷа Рандҳир Сингҳ паёми видеоӣ фиристод.

Раҷа Рандҳир гуфт, ки то 19-ум Бозиҳои Осиё, ки 10 сентябри соли 2022 кушода мешавад, танҳо як сол мондааст.

"Ду соли охир, бинобар пандемия, барои ҷаҳон осон набуд, махсусан барои омодагӣ ба бозиҳо, - гуфт Раҷа Рандҳир. - Аммо ба туфайли саъю кӯшиши якҷоя омодагӣ ба Ҳангжоу-2022 хеле хуб идома дорад, ки хеле шодам. Варзиш рамзи ваҳдат, устуворӣ ва далерист. Умедворам, ки Бозиҳои Осиё мардумро рӯҳбаланд мекунад ва ба онҳо нерӯ мебахшад, то бо пандемия мубориза баранд ва ба пеш ҳаракат кунанд - тавре шиори Ҳангжоу-2022 мегӯяд, "Аз дил ба дил, сӯи фардо". То 19-ум Бозиҳои Осиё дар Ҳангжоу ҳамагӣ як сол мондааст ва мо он лаҳзаеро бесаброна интизорем, ки ҳамаи мо метавонем дубора муттаҳид шавем. Умедворам, ки Бозиҳои XIX Осиё муваффақияти комил доранд ва ҳамаи варзишгарони ширкаткунанда ба натиҷаҳои назаррас ноил мешаванд”.

Ҳусайн Ал-Мусаллам ҳамаи иштироккунандагонро ба маросими як сол то бозиҳо табрик гуфт.

"Мо расо як сол қабл то бузургтарин мусобиқаи маҷмӯии варзишӣ дар қитъаи Осиё ҳастем, - гуфт ӯ. - Ман хушҳолам, ки варзишгарон ва ҳамаи кумитаҳои миллии олимпии узви Шӯрои олимпии Осиёро барои иштирок дар Бозиҳои 19-уми Осиё, ки дар шаҳри зебои Ҳангжоу аз 10 то 25 сентябри соли 2022 баргузор мешавад, даъват мекунам. Ба шумо барори кор орзумандам ва бесаброна интизори ҳамаи шумо пас аз як сол хоҳем буд".

Мавзӯи маросими 60-дақиқаӣ "Интизорӣ" буд, ки умеди мардуми Ҳангжоу, Чин ва Осиёро ба муваффақияти Бозиҳои Осиё инъикос мекард. Барнома муаррифии тарҳи машъал ва либосҳои расмиро дар бар мегирифт.

Машъал "Оташи абадӣ" ном дорад ва рамзи тамаддуни Чинро, ки дар тӯли 5000 сол аз насл ба насл мегузарад, инчунин якпорчагии варзишгарон ва тавоноии тавлидоти технологии музофоти Жэян дар шарқи Чинро ифода мекунад.

Либосҳои расмӣ дар ду категория: барои намояндагони Шӯрои олимпии Осиё ва барои доварон, масъулони техникӣ ва аъзои ҳакамот истеҳсол карда шудааст.

Либосҳои варзишӣ барои OCA сафед бо тарҳҳои бунафш ва зард мебошад ва либоси расмӣ асосан арғувонӣ аст. Либосҳои варзишии доварон ва кормандони техникӣ сафед бо тарҳҳои бунафш ва либоси расмӣ кабуд ва сафед аст.

19-ум Бозиҳои Осиё аз 10 то 25 сентябри соли 2022 дар Ҳангжоу, маркази музофоти Жэян ва панҷ шаҳри муштарак баргузор мешавад. Бозиҳо дар 55 макон аз рӯи 40 намуди варзиш, 61 равияи варзишӣ ва 482 мусобиқа ҷараён хоҳад гирифт.

• ←
• →