«Хуҷанд» – барандаи медали нуқраи Чемпионати Тоҷикистон-2020

26-27 сентябр бозиҳои даври ҳабдаҳуми Чемпионати Тоҷикистон оид ба футбол миёни дастаҳои лигаи олӣ баргузор шуд.

Дар бозии марказии давр дастаи “Хуҷанд” дар меҳмонӣ тими “Хатлон”-ро бо ҳисоби 3:2 мағлуб намуда, пеш аз ду давр то анҷоми чемпионат сазовори медалҳои нуқра гардида, ҷояшро дар Ҷоми КФО-2021 таъмин кард. Ҳисоби бозиро дар дақиқаи сеюм Дилшод Бозоров кушод. Фатҳулло Фатҳуллоев дар дақиқаи 12, Ҷаҳонгир Эргашев дар дақиқаи 32-юм ду тӯби дигар ба дарвозаи ҳариф ворид карданд. Дар нимаи дуюм бохтариҳо ташаббус ба даст гирифтанд, вале ба задани ду гол даст ёфтанд - Умарҷон Шарипов дар дақиқаи 64, Парвиз Боқӣ-Охунов дар дақиқаи 90+2.
Бозӣ миёни дастаҳои “Куктош” – “Истаравшан” мусовӣ – 2:2 хотима ёфт. Голҳои дастаи ноҳияи Рӯдакиро Муҳсинҷон Абдуғаффоров, Мбаке Диеудонӣ, голҳои “Истаравшан”-ро Отабек Каримов ва Азизҷон Шамсиев ба ҳадаф расониданд.
Дар бозии дигар “Регар-ТадАЗ”-и шаҳри Турсунзода дар майдони худ бар тими “Файзканд”-и Восеъ бо ҳисоби 1:0 ғолиб омад. Се холро ба дасти шаҳри Турсунзода ҳимоятгар Доробҷон Эргашев овард.
“Душанбе-83” бар тими “Локомотив-Помир” бо ҳисоби 1:0 ғалаба карда, ҷояшро дар лигаи олӣ ҳифз намуд. Голи ягонаро бозингари “Локомотив-Помир” Исроил Холов ба дарвозаи дастааш зад.
Ниҳоят, “Истиқлол”, ки унвони чемпиониро аллакай гирифтааст, аввалин бохтро дар чемпионати мамлакат аз дастаи КМВА чашид – 1:0. Ягона голро Мунир Давлатбеков дар дақиқаи 40-ум ба номаш сабт кард.
Ҳамин тариқ, то анҷоми 29-ум Чемпионати Тоҷикистон оид ба футбол миёни дастаҳои лигаи олӣ ду даври дигар боқӣ монд. Дар даври 15-ум, ки 29-30 сентябр баргузор мешавад, «Истаравшан» бо «Файзканд», «Регар-ТадАЗ» бо «Хуҷанд», «Куктош» бо «Истиқлол», «Хатлон» бо «Локомотив-Помир» ва КМВА бо «Душанбе-83» вомехуранд. Бозиҳои даври ҷамъбастӣ – 18-ум - 4 октябр ба нақша гирифта шудааст. Дар ин давр «Файзканд» бо «Локомотив-Помир», «Душанбе-83» бо «Истиқлол», «Хуҷанд» бо КМВА, «Истаравшан» бо «Хатлон», «Регар-ТадАЗ» бо «Куктош» бозӣ хоҳанд кард.

• ←
• →