Пирӯзии “Куктош” бар “Панҷшер”, мусовии КМВА “Помир” бо “Хатлон”

Бо баргузор шудани ду бозӣ дар рӯзи 27 апрел даври чоруми Чемпионати Тоҷикистон оид ба футбол миёни дастаҳои лигаи олӣ ба анҷом расид.

Барандаи медалҳои биринҷии мавсими гузашта – дастаи “Куктош” дар майдони худ бар тими “Панҷшер” бо ҳисоби 3:1 пирӯз шуд. Ҳисоб дар дақиқаи 8-ум кушода шуд - Муҳсин Абдуғаффоров дарвозаи “Панҷшер”-ро рахна кард. Дар дақиқаи 17 Холмурод Назаров ҳисобро афзуд. Қабл аз анҷоми нимаи аввал меҳмонон тавассути Муҳаммадраҷаб Ҷобиров тавонистанд ҳисобро тағйир диҳанд – 2:1. Дар дақиқаи 83-и нимаи дуюм Муҳсин Абдуғаффоров голи дуюми худ ва сеюми дастаашро аз пеналтӣ ба ҳадаф расонд ва бо ҳисоби 3:1 бозӣ ба анҷом расид.
Бозӣ миёни дастаҳои КМВА “Помир” – “Хатлон” бошад, мусовӣ – 0:0 анҷом ёфт.
Ду бозии дигари даври чорум 25-26 апрел доир гардида буданд. “Хуҷанд” бар “Регар-ТадАЗ” (3:1) ва “Истиқлол” бар “Истаравшан” (4:0) ғолиб омаданд.
Ҳамин тариқ, баъд аз натиҷагирии даври чорум бо 10 хол аз 4 бозӣ дастаи “Истиқлол” мавқеашро дар ҷои аввали ҷадвали Чемпионати Тоҷикистон устувор кард. “Хуҷанд”-у “Куктош” бо 7-холӣ дар ҷойҳои дуюму сеюм мавқеъ доранд.

Бозиҳои даври панҷуми Чемпионати Тоҷикистон 4 май баргузор мешаванд. Дар ин рӯз “Панҷшер” бо “Истиқлол”, “Хуҷанд” бо “Куктош”, “Хатлон” бо “Регар-ТадАЗ” ва “Истаравшан” бо КМВА “Помир” вомехуранд.

	ДАСТАҲО	Б	Ғ	М	Б	Т/Т	Х
1	"Истиқлол" (Душанбе)	4	3	1	0	13/4	10
2	"Хуҷанд" (Хуҷанд)	4	2	1	1	6/4	7
3	"Куктош" (Рӯдакӣ)	4	2	1	1	7/6	7
4	"Регар-ТадАЗ" (Турсунзода)	4	2	0	2	6/7	6
5	"Панҷшер" (Ҷалолиддин Балхӣ)	4	2	0	2	4/5	6
6	"Хатлон" (Бохтар)	4	1	1	2	3/5	4
7	"Истаравшан" (Истаравшан)	4	1	0	3	4/9	3
8	КМВА "Помир" (Душанбе)	4	0	2	2	1/4	2

• ←
• →