БОЗИИ РАФИҚОНА МИЁНИ МУНТАХАБҲОИ ТОҶИКИСТОН ВА ТАЙЛАНД МУСОВӢ ШУД

Бозии рафиқона миёни дастаҳои мунтахаби Тоҷикистон ва Тайланд, ки 29 май дар шаҳри Шарҷаи Амороти Муттаҳидаи Араб доир гашт, мусовӣ – 2:2 анҷом ёфт.

Дастаи мунтахаби Тоҷикистон бозиро бо ҳисоби 0:2 мебохт, вале ташаббус ба даст гирифта, тавонист дар охири дидор бозиро мусовӣ кунад. Дар ҳайати мунтахаби мо голҳоро Эҳсони Панҷшанбе ва Ислом Зоиров заданд.

24 май дастаи мунтахаби Тоҷикистон бо тими миллии Ироқ низ бозии рафиқона доир кард, ки бидуни гол (0:0) хотима ёфт.

Дастаи мунтахаби Тоҷикистон дар ҷамъомади машқӣ-таълимӣ дар Дубай то 3 июн мемонад ва баъдан барои анҷом додани ду бозии боқимондаи марҳилаи интихобии Чемпионати ҷаҳон-2022 дар гурӯҳи “F” муқобили мунтахабҳои Ҷопон (7 июн) ва Мянма (15 июн) ба Осакаи Ҷопон сафарбар мегардад.

Бозии рафиқона

Тайланд – ТОҶИКИСТОН – 2:2

Голҳо: Муеанта Суфанат, 50 (1:0). Муеанта Суфанат, 58 (2:0). Эҳсони Панҷшанбе, 63 (2:1). Ислом Зоиров, 89 (2:2).

Тоҷикистон: Рустам Ятимов, Ваҳдат Ханонов, Давронҷон Эргашев (Зоир Ҷӯрабоев, 77), Аҳтам Назаров, Манучеҳр Сафаров, Муҳаммадҷон Раҳимов (Нуриддин Ҳамроқулов, 46), Эҳсони Панҷшанбе, Комрон Турсунов (Рустам Соиров, 46), Илҳомҷон Баротов (Шериддин Бобоев, 46, Парвизҷон Умарбоев, 72), Алиҷони Айнӣ (Ислом Зоиров, 46), Шаҳром Самиев.

Сардовар: Султон Муҳаммад Солеҳ (АМА).

29 май. Шарҷа, АМА. Варзишгоҳи Халид ибни Муҳаммад.

• ←
• →