Ғаниҷон Ғаниев - чемпиони Осиё миёни наврасон

Паҳлавони навраси кишвар Ғаниҷон Ғаниев дар Чемпионати Осиё оид ба дзюдо миёни наврасон сазовори медали тилло шуд.

Чемпионати Осиё миёни наврасон оид ба дзюдо 27-28 июл дар Тайпейи Чин баргузор шуд.
Ғаниҷон дар вазни -73кг дар даври аввал озод буд, сипас дар чорякфинал варзишгари Австралия Даннӣ Воҷникевичро шикаст дода, ба нимфинал баромад. Ӯ дар нимфинал бар варзишгари мизбон Чин-Лианг Чу ва дар финал бар намояндаи Қазоқистон Серикбол Йестай дастболо шуд. Ғаниҷон соли гузашта дар Чемпионати Осиё миёни наврасон дар Лубнон сазовори медали биринҷӣ шуда буд.
Паҳлавони дигари навраси тоҷик Мансур Раҳмон дар вазни -90кг сазовори медали биринҷӣ шуд. Мансур низ дар даври аввал озод буд, баъдан дар чорякфинал бар намояндаи Австралия Лиам Спиллен ғалаба кард, вале дар нимфинал аз намояндаи кишвари мизбон Шенг-Кай Лин шикаст хурд. Ӯ сипас дар қувваозмоӣ барои ҷои сеюм бар варзишгари Қазоқистон Нурасил Болат дастболо шуд.
Ду варзишгари дигари мо Ҳайдаршо Мирзомуддинов дар вазни -73кг ва Иброҳимҷон Элмуродов дар вазни +90 дар даври аввал аз ҳарифонашон шикаст хурданд.
Ёдовар мешавем, ки дирӯз Аҳлия Муъминова дар вазни -52кг миёни духтарон сазовори медали биринҷӣ гардида буд.
Дар чемпионат 159 варзишгар (94 писар, 65 духтар) аз 17 давлати қораҳои Осиё ва Уқёнус иштирок карданд.
Акнун 29-30 июл Чемпионати Осиё миёни ҷавонон баргузор мешавад. Дар ин синну сол 170 варзишгар (100 писар, 70 духтар) аз 21 давлат иштирок мекунанд. Аз ҷумҳурии мо 9 варзишгар – Меҳрзод Суфиев (-60кг), Шодмон Ризоев, Ҷамолиддин Абдуллоев (-66кг), Муҳаммадшариф Наҷмиддинов (-73кг), Оламафрӯз Абдураҳмонов (-81кг), Эмомризо Анварзода (-90кг), Иброҳимҷон Элмуродов, Шарифҷон Назриев (-100кг) миёни писарон ва Шоҳида Қаландарова (-57кг) миёни духтарон ба Тайпей сафарбар гардидаанд.

• ←
• →