Аввалин мусобиқаи байналмилалии дзюдо дар соли нав фардо оғоз мегардад

24-26 январ дар пойтахти Исроил – шаҳри Тел-Авив Гран-При оид ба дзюдо баргузор мешавад, ки дар он варзишгарони тоҷик низ иштирок мекунанд.

Гран-Прии Тел-Авив аввалин мусобиқаи байналмилалӣ оид ба дзюдо дар соли 2019 мебошад. Тибқи иттилои Федератсияи байналмилалии дзюдо дар мусобиқа 405 варзишгар (230 мард, 177 зан) аз 54 кишвари дунё иштирок мекунанд.
Ҷумҳурии моро дар ин мусобиқа 4 варзишгар – Беҳрӯз Хоҷазода, Хайёмиддин Ҷабборов (ҳар ду вазни -73кг), Акмал Муродов (-81кг) ва Саидҷалол Саидов (-100кг) намояндагӣ мекунанд.
Фардо – 24 январ қувваозоиҳо дар вазнҳои -60кг, -66кг миёни мардон, -48кг, -52кг, -57кг миёни бонувон доир мегардад. 25 январ варзишгарони вазнашон -73кг, -81кг миёни мардон, -63кг, -70кг миёни бонувон рӯи гилем мебароянд. Дар рӯзи сеюми мусобиқа қувваозмоиҳо дар вазнҳои -90кг, -100кг, +100кг миёни мардон, -78кг, +78кг миёни бонувон баргузор мешавад.
Ғолибону ҷоизадорони мусобиқа дар баробари медал мукофотпулӣ низ дарёфт мекунанд: барои ҷои аввал дар ҳамаи вазнҳо 3000 доллари ИМА, барои ҷои дуюм 2000 доллар ва барои ҷойҳои сеюм 1000 доллари ИМА пешбинӣ шудааст. Ҳамчунин, варзишгарон соҳиби холҳои олимпӣ мешаванд.

Феълан дар раддабандии олимпӣ Акмал Муродов дар ҷои 53-и вазни -81кг, Саидҷалол Саидов низ дар ҷои 53-и вазни -100кг, Беҳрӯз Хоҷазода дар ҷои 56 ва Хайёмиддин Ҷабборов дар ҷои 99-и вазни -73кг мавқеъ доранд.

• ←
• →