Мунтахаби Тоҷикистон ба финали Ҷоми Бангабанду роҳ ёфт

Тими мунтахаби Тоҷикистон оид ба футбол ба финали мусобиқаи байналмилалии «Bangabandhu Gold Cup», ки дар Бангладеш ҷараён дорад, роҳ ёфт.

Дар бозии нимфиналӣ имрӯз – 9 октябр - тими мунтахаби Тоҷикистон зери роҳбарии иҷрокунандаи вазифаи сармураббӣ Алишер Тухтаев бар тими Филиппин бо ҳисоби 2:0 ғалаба кард. Ҳисобро дар дақиқаи 31-уми бозӣ Комрон Турсунов кушод. Дар дақиқаи 90+7 Аҳтам Назаров голи дуюми Тоҷикистонро вориди тури дарвозаи ҳариф намуд.
Дар даври финалӣ (12 октябр) ҳарифи Тоҷикистон ғолиби ҷуфти Фаластин-Бангладеш хоҳад буд, ки фардо муайян мегардад.
Ёдовар мешавем, ки дар мусобиқа 6 даста дар гурӯҳ бозӣ карданд. Тоҷикистон дар бозии даври аввали гурӯҳи “А” бар тими миллии Непал (2:0) пирӯз шуда, дар даври дуюм аз тими Фаластин мағлуб гардид (0:2). Фаластин бо 6 хол, Тоҷикистон бо 3 хол ба даври нимфинал баромаданд. Дар гурӯҳи “В” дастаи мизбон – Бангладеш ва Филиппин ба даври дигар роҳ ёфтанд. Дастаҳои Непал аз гурӯҳи “А” ва Лаос аз гурӯҳи “В”, ки хол нагирифтанд, аз идомаи сабқат маҳрум шуданд.

• ←
• →