Ноиби аввали Президенти Ассотсиатсияи кумитаҳои миллии олимпӣ Ҷоан Бин Ҳамад Оли Сонӣ ва ҳайати ҳамроҳаш бо сафари корӣ ба Душанбе омаданд

     Нимаи дуюми рӯзи 2 – юми апрели соли 2025 ноиби аввали Президенти Ассотсиатсияи кумитаҳои миллии олимпӣ, Президенти Кумитаи Олимпии давлати          Қатар ҷаноби Ҷоан Бин Ҳамад Оли Сонӣ ва ҳайати ҳамроҳаш бо мақсади анҷом додани сафари корӣ ба Ҷумҳурии Тоҷикистон ташриф оварданд.
Меҳмонони олиқадрро дар Фурӯдгоҳи байналмилалии шаҳри Душанбе ҳайати расмии Ҷумҳурии Тоҷикистон таҳти роҳбарии Зулфиқор Гулаҳмадзода - Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, ноиби аввали Президенти Кумитаи миллии олимпии Тоҷикистон гарму самимӣ истиқбол намуданд.
      Сипас, қисми бегоҳ меҳмонон аз имконоти сайёҳиву фарҳангии пойтахти кишвари Тоҷикистон шаҳри Душанбе боздид ба амал оварда, аз бинои боҳашамати Масҷиди ҷомеи марказии шаҳри Душанбе ба номи “Имоми Аъзам - Абӯҳанифа Нӯъмон ибни Собит", ки бо як услуби зебои шарқиёна ва бо сифати баланди бинокорӣ бунёд ёфтааст дидан намуда, ба ҳунару истеъдоди бинокорони тоҷик баҳои баланд доданд.
     Зимнан, дар доираи сафари корӣ ба Ҷумҳурии Тоҷикистон ҷаноби Ҷоан Бин Ҳамад Оли Сонӣ - ноиби аввали Президенти Ассотсиатсияи кумитаҳои миллии олимпӣ, Президенти Кумитаи Олимпии давлати Қатар ва ҳайати ҳамроҳаш қисми аввали рӯзи дуюм дар шаҳри Душанбе бо муҳтарам Рустами Эмомалӣ - Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе, Президенти Ассотсиатсияи футболи Осиёи Марказӣ мулоқот анҷом доданд.
    Зимни суҳбат муҳтарам Рустами Эмомалӣ нақши Ассотсиатсияи кумитаҳои миллии олимпӣ ва Шӯрои олимпии Осиёро дар иштироки фаъоли варзишгарони тоҷик дар бозиҳои олимпии ҷаҳон ва минтақа муҳим арзёбӣ карда, пешниҳод намуданд, ки варзиши гуштингирӣ дар марҳилаи аввал - ба Бозиҳои олимпии Осиё ва дар марҳилаи дуюм - ба Бозиҳои олимпии ҷаҳонӣ ворид карда шавад. Изҳори бовар карда шуд, ки Ассотсиатсияи кумитаҳои миллии олимпӣ ва Шӯрои олимпии Осиё таклифи инҷонибро дар муҳлатҳои наздик ҷонибдорӣ менамоянд.
      Ҳамзамон қайд гардид, ки дар воқеъ варзиш воситаи муассири беҳдошти тарғиби тарзи ҳаёти солим барои инсоният, махсусан ҷавонон ба шумор меравад ва боиси ифтихору хушҳолист, ки маҳз бо дастгириҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соҳаи варзиш, бахусус навъҳои варзиши олимпӣ дар кишвари мо дар марҳилаи рушд қарор дорад.
   Ҳамин тавр баъд суҳбату мулоқоти сатҳи баланд сафари кории ноиби аввали Президенти Ассотсиатсияи кумитаҳои миллии олимпӣ, Президенти Кумитаи Олимпии давлати Қатар ва ҳайати ҳамроҳаш дар Ҷумҳурии Тоҷикистон ба анҷон расида, бо умеди тавсеаи ҳамкориҳои баъди ва бо рӯҳияи баланди дӯстӣ меҳмононро дар Фурӯдгоҳи байналмилалии шаҳри Душанбе ҳайати расмии Ҷумҳурии Тоҷикистон гусел намуданд.