Екатеринбург – мизбони Универсиада-2023

Кумитаи иҷроияи Федератсияи байналмилалии варзишҳои донишгоҳӣ (FISU) шаҳри Екатеринбурги Федератсияи Россияро мизбони Универсиадаи соли 2023 интихоб намуд.

Ҷаласаи Кумитаи иҷроияи FISU 2 июл дар шаҳри Наполии Италия – қабл аз баргузории Универсиада-2019 доир гашт.
Барои Универсиадаи соли 2023 умуман 28 иншоот пешбинӣ шудааст, ки алаккай 20 иншоот омода аст. Барои мусобиқаҳои волейбол толори нав сохта шуда, барои намудҳои теннис, дзюдо, гимнастика ва варзишҳои обӣ таҷҳизоти нав харидорӣ карда мешавад. Мусобиқаҳо аз 8 то 19 август баргузор хоҳанд шуд.
Россия бори охир Универсиадаи тобистонаро соли 2013 дар шаҳри Қазон гузронида буд. Аз ин қабл соли 1973 Москва мизбони бозиҳои варзишии донишҷӯён буд. Универсиадаи тобистонаи соли 2021 дар шаҳри Чэндуи Ҷумҳурии Мардумии Чин хоҳад гузашт.
3-14 июли соли 2019 дар шаҳри Наполии Италия Бозиҳои ҷаҳонии варзишӣ миёни донишҷӯён-варзишгарон - 30-юм Универсиадаи ҷаҳонии тобистона баргузор мешавад. Ба барномаи Универсида-2019 15 намуди варзиш дохил карда шудааст: баскетбол, варзишҳои обӣ (шиноварӣ, ҷаҳиш ба об, тӯббозӣ дар об), варзиши сабук, волейбол, гимнастика (бадеӣ, варзишӣ), дзюдо, заврақронӣ, камонварӣ, регбӣ-7, таеквондо, теннис, тенниси рӯи миз, тирандозӣ, футбол, шамшербозӣ. Донишҷӯ-варзишгарон аз рӯи ин намудҳо барои 222 маҷмуи медалҳо мубориза мебаранд.
Дар Универсиадаи соли 2019 ҳудуди 6000 донишҷӯ-варзишгар аз 112 кишвар иштирок мекунанд.

• ←
• →