Натиҷаи иштироки қайиқронҳои тоҷик дар Ҷоми ҷаҳон

Аз 31 май то 2 июн дар шаҳри Дуисбурги Олмон даври дуюми Ҷоми ҷаҳон оид ба қайиқронӣ дар байдарка ва каноэ баргузор шуд, ки дар он варзишгарони тоҷик иштирок карданд.

Дастаи мунтахаби қайиқронии кишвар аз 4 нафар - Шаҳриёр Даминов, Умар Рустамов, Ҷамшед Ғуломов ва Ҷумъахон Холдорбеков иборат буд.
Шаҳриёр Даминов дар каноэи якнафарӣ дар масофаҳои 500, 1000 ва 5000 метр қувваозмоӣ намуд. Ӯ дар масофаи 500 метр дар даври гурӯҳӣ миёни 8 нафар бо натиҷаи 01:56.443 чорум шуда ба марра расид ва ба даври нимфинал роҳ ёфт. Дар нимфинал Шаҳриёр миёни 9 нафар бо натиҷаи 01:52.039 ҷои ҳафтумро ишғол кард ва натавонист ба даври финал барояд. Шаҳриёр дар масофаи 1000 метр дар даври гурӯҳӣ бо натиҷаи 4:13.517 миёни 9 иштирокчӣ ҷои шашумро сазовор гардид ва ба нимфинал баромад ва дар ин давр миёни 9 нафар бо натиҷаи 04:14.559 охирин шуда ба марра расид ва аз идомаи сабқат маҳрум шуд. Шаҳриёр Даминов дар рӯзи сеюм дар масофаи 5000 метр нерӯ санҷид ва миёни 27 нафар бо натиҷаи 23:34.834 ҷои нуҳумро ишғол намуд.
Рустам Умаров низ дар каноэи якнафарӣ дар масофаҳои 200, 500 ва 5000 метр сабқат намуда, дар даври гурӯҳии масофаи 200 метр бо натиҷаи 45.593, дар масофаи 500 метр бо натиҷаи 2:08.358 охирин шуда ба марра расид ва аз идомаи мусобиқа канор монд. Ӯ дар масофаи 5000 метр бо натиҷаи 25:51.278 ҷои 21-умро ишғол кард.
Ҷамшед Ғуломов ва Ҷумъахон Холдорбеков дар байдарка қувваомоӣ намуданд. Дар даври гурӯҳӣ Ҷамшед дар масофаи 200 метр, Ҷумъахон дар масофаи 500 метр ба марра нарасиданд.
Дар дуюмин даври Ҷоми ҷаҳонии Федератсияи байналмилалии қайиқронӣ дар байдарка ва каноэ (ICF) варзишгарон аз 64 давлати дунё иштирок карданд. Даври аввали Ҷоми ҷаҳон 23-26 май дар шаҳри Познани Лаҳистон баргузор шуда буд.

• ←
• →