Лигаи олӣ: Натиҷаи бозиҳои даври 13-ум

Рӯзҳои истироҳат бозиҳои даври 13-уми чемпионати Тоҷикистон оид ба футбол миёни дастаҳои лигаи олӣ баргузор шуданд.

4 август ду вохӯрӣ доир гашт. Дар бозии марказӣ давр дастаи “Регар-ТадАЗ”-и Турсунзода дар майдони худ бар тими “Куктош”-и ноҳияи Рӯдакӣ бо ҳисоби минималии 1:0 ғалаба кард. Голи ягонаро Бахтиёр Қаландаров дар дақиқаи 82-юм зад.
Бохти “Куктош”-ро дастаи КМВА “Помир” натавонист истифода барад. Бозии ин даста бо тими “Панҷшер” бидуни гол анҷом ёфт.
Мухлисони футбол рӯзи 5 август шоҳиди ду бозии дигари даври 13-ум шуданд. Муддаиёни медалҳои тиллои чемпионати имсола – “Истиқлол” ва “Хуҷанд” дар меҳмонӣ ба пирӯзӣ даст ёфтанд. “Истиқлол” бар тими “Барқчӣ” (1:0), “Хуҷанд” бар дастаи “Хатлон” (2:1) ғалаба карданд. Голи дастаи Душанберо Дилшод Восиев дар дақиқаи 31-ум вориди дарвозаи ҳариф кард. Дар дидор миёни дастаҳои “Хуҷанд” – “Хатлон” дар нимаи аввал Кароматулло Саидов – бозингари дастаи Бохтар ҳисобро кушод. Дар нимаи дуюм хуҷандиҳо ду гол заданд. Дар дақиқаи 56 легионери узбекистонии “Хуҷанд” ҳисобро баробар карда, дар дақиқаи 90+5 Манучеҳр Ахмедов аз пеналтӣ голи ғалабаоварро зад.
Бозиҳои даври чордаҳум 18-19 август баргузор мешавад. Дар даври охирини марҳилаи дуюм “Куктош” бо “Панҷшер”, “Регар-ТадАЗ” бо “Барқчӣ”, “Хуҷанд” бо КМВА “Помир” ва “Истиқлол” бо “Хатлон” вомехуранд.

МАВҚЕИ ДАСТАҲО ДАР ҶАДВАЛИ ЧЕМПИОНАТ

• ←
• →